• مرحبا بكن في اناقة مغربية في حلة جديدة وطاقم جديد . ومرحبا بنا عند اهل المغرب الكرام اهل الكرم والجود. يمكن للعضوات القديمات الدخول والمشاركة باسماءهن القديمة فقط يتوجب عليهن طلب كلمة مرور جديدة عبر خاصية استعادة كلمة المرور

عندك 2مليون شنو هو المشروع لي ديري بها

fadoua 11

عضوة جديدة
الاخوات بغيت اقتراحتكم حيت فعلا محتاجاها وكنخدها بعين الاعتبار
عندي 2مليون وبغيت ندير شي مشروع يكون ناجح اش بان ليكم اش ندير ؟خياطة وكراء الباس تقليدي او البيع والشراء فالحوياج؟(حوياج دراري صغار او العيالات ؟) او محلبة؟
او اقترحو عليا نتوما لكتشوفوه مربح وكيتمشا فهد الوقت متبخلوش علبا الله يجزيكم ويعطكم ماتمنيتو
 

انيقة فاسية

عضوة جديدة
انا ختي فنضري ديري شي محل لبيع المكياج و العطورات و مواد التجميل و خودي ليماغك مزيانين ماشي داكشي سواقي و بداي بتمن منخفض شوية باش تجمعي لكليانات و ضربي حساب المحل يكون فموقع زوين و بعيد على محلات مشابهة ليك ويمكن ليك ديري حتى مع شركات فحال اوريفلام افون راه يتهلاو فالمشاركات معاهم سوغتو الى جمعتي ليهم كليانات و علاش لا مرة مرة ديري لي سولد و تكتبيها على واجهة المحل باش تلفتي انتباه الناس و حتى الا كان عندك معارف كوافورات و لا خياطات تيقا و صيهم يدورلط اشهار للناس حيت هدوك لبلايص هوما لي كيتجمعو فيهام العيالات و حنا ادرا بعضيتنا ههه وحد لمسألة اخرى ضروري خاصك الصبر راه ضروري ما غاتجي وقيتة و غادة تقولي صافي مابقاتش نافعني هاد الضومين. و الفياقة و الفطانة بطبيعة الحال سوق التجارة ماشي ساهل الى ما كنتي فايقة راه ياكلوك و توكلي على الله .
 

nana settatia

عضوة جديدة
الا كنتي اصلا خياطة راه خياطة فيها لفلوس واخا تبداي غير من دارك اما ادا ماعندكش مع خياطة بداي تبيع لحوايج لعيالات ولكن حتى بيع وشرا كيبغي يكون عندك معارف وصحابات باش سلعة ديالك تمشى
 

Souma*

عضوة جديدة
اختي .الله .يسر .لك .فنظري .مشروع .محلبةرائع .تخصيفالعصائر.والحلويات.غير.خاص .المكان .المناسب .بشايكون.الرواج
 

وتر الأمل

عضوة جديدة
السلام عليكم
اولا واش المحل غادي تكريه ولا في الدار ؟ باش ديري بحساب فلوس الكراء
ثاني حاجة شوفي المنطقة شنو ناقصها باش مشروعك مايلقاش منافسين بزاف و يجيك إحباط من الاول ايلا الكليان مشاو عند لي مولفين

قبل ما نشوف اقتراحاتك كنت غادي نقترح عليك ايلا عندك مع العجين و الحلويات هذا مشروع ناجح إن شاء الله و مدر للدخل
حيث الحوايج تقدر تبقى عندك السلعة و تولي تخرج موضة اخرى جديدة تضطري ديري صولد باش تخرجي القديم و تجيبي الجديد
و ماشي كل نهار تضمني انك تبيعي راك عارفة البيع و الشرا ديالنا و زيد الاغلبية كيبغي المصارفة يعني تبيعي و تسناي رزقك ما يكمل على شهرين ولا اكثر
فكرة الخياطة كيف قالوا لك الاخوات ايلا كنت انت خياطة راه حتى هي تقدري تفنني فيها و ديري بلاصتك في السوق

المهم اي مشروع جلسي و درسيه مزيان و شوفي الايجابيات و السلبيات
غير هو المعجنات و الحلويات راه عن تجربة شفت عيالات و بنات داروا منها شحال من حاجة ماشاء الله عليهن حيث دغيا كتمشى لهم و كنعرف واحدة مخصصة وقتها غير للمخابز الكبرى
كتوجد أنواع الحلويات و المخامر بانواعها راه ماشاء الله الخير فاض عليها و كتفكر تشري دابا آلات بروفيسيونال باش تعاونها في الخدمة و توفر عليها الوقت ، حيث بدات غير بفران الدار صافي
وواحدة اخرى كنتقدى عندها البطبوط كل صباح ايلا غادية للخدمة ، عندها كاراج فدارها قاسماه غير بريدو كعجن فجهة و الجهة الاخرى دايرة داك الكونطوار لي كتبيع فيه ، تخصص ديالها البطبوك و الملوي ،
بدات وحدها و دابا جابت معها واحد البنت كتعاونها و لكن سلعتها ماشاء الله متقونة و لذيذة ، شي مرات كنمشي عندها مع 7ونص صباح و كنلقاها كملات و بدات في العجنة الثالثة و عجنة اخرى حاطاها كتخمر

فكري و درسي و قرري و حنا معاك ان شاء الله نعاونوك
الله يسر لك فلي فيها الخير
 

الخيزرانة

عضوة جديدة
الاخوات بغيت اقتراحتكم حيت فعلا محتاجاها وكنخدها بعين الاعتبار
عندي 2مليون وبغيت ندير شي مشروع يكون ناجح اش بان ليكم اش ندير ؟خياطة وكراء الباس تقليدي او البيع والشراء فالحوياج؟(حوياج دراري صغار او العيالات ؟) او محلبة؟
او اقترحو عليا نتوما لكتشوفوه مربح وكيتمشا فهد الوقت متبخلوش علبا الله يجزيكم ويعطكم ماتمنيتو
khti diri mojawharat AK BIJOUX machrou3 naaajih wlla diri acier inoxydable bqay tqdday mn mawqi3 sheine raytl3o 3lik rkhass o3awdi fihom lbi3
 
أعلى